अमृत झा

हामीले आफ्ना नागरिकको पक्षमा आवश्यक पहल गरिरहेका छौं । तर अन्तिम निर्णय त्यहाँको कानुनअनुसार नै हुन्छ- परराष्ट्र मन्त्रालय

उनको रिहाइ भइनसकेको स्पष्ट पार्दै परराष्ट्र मन्त्रालयले यसअघि सार्वजनिक भएको गलत सूचना र त्यसबाट सिर्जना भएको अन्योलप्रति क्षमा मागेको हो । 

सरकारले इरानको कब्जामा रहेका अमृत झालाई नेपाल ल्याउने प्रक्रिया जारी राखेको जनाएको छ ।

यसअघि परराष्ट्रमन्त्री शिशिर खनालले झा रिहा भइसकेको भन्दै सामाजिक सञ्जालमा पोस्ट गरेका थिए । तर, उनी हालसम्म पनि इरानको जेलमै बन्दी रहेको पाइएपछि चौतर्फी आलोचना भइरहेकाे छ ।

रिहा भएका भनिएका अमृत अझै जेलमै छन् । नेपालमा रहेको उनको परिवार थप तनावमा परेको छ ।

यसअघि परराष्ट्रमन्त्री शिशिर खनाल र परराष्ट्र मन्त्रालयले २ वैशाखमै झा रिहा भएको जानकारी दिएका थिए ।

इरानमा तेल लिएर फर्किने क्रममा हर्मुज क्षेत्रको बन्दर अब्बास बन्दरगाहबाट इरानी रेभुलेसन गार्डले फारसी खाडीको होर्मुज स्ट्रेटमा उनलाई नियन्त्रणमा लिएको थियो ।

दुबईको एक पानी जहाज कम्पनीमा क्याप्टेनका रूपमा काम गर्दै आएका अमृत झालाई तेल लिएर दुबई फर्किने क्रममा नियन्त्रणमा लिइएको थियो ।