डिजिटल युग

मानव सभ्यताकै सबैभन्दा ठूलो उपलब्धि मानिएको प्रविधिले जीवनलाई जति सहज र सुविधासम्पन्न बनाएको छ, भित्री रूपमा मानिसलाई त्यति नै एक्लो, विखण्डित र अस्थिर बनाउँदै लगेको छ। ८ सेकेन्डमा खुम्चिएको ध्यान, सामाजिक सञ्जालले बढाएको कृत्रिम सम्बन्ध र अल्गोरिदमले नियन्त्रण गरेको चेतना- आधुनिक युगको सबैभन्दा ठूलो सङ्कट हो।  

नेपाली राजनीति र समाजलाई प्रविधिको नकारात्मक असरबाट बचाउन राज्यले नियमनकारी निकायलाई मात्र होइन, नागरिकको विवेकलाई पनि उत्तिकै सुदृढ बनाउनुपर्दछ।

संवैधानिक निकाय र तथ्य-जाँच गर्ने संस्थाहरूको सक्रियता जति आवश्यक छ, त्योभन्दा बढी मतदाताको सचेत विवेक नै लोकतन्त्रको रक्षाको मुख्य कडी हो। प्रविधिले सूचना दिन्छ, तर त्यसको ‘सन्दर्भ’ बुझ्ने काम मानवीय चेतनाकै हो ।