इरान इजरायल युद्ध 2025 फेरि एकपटक भयावह मोडमा पुगेको छ। इजरायली वायुसेनाले इरानी सैन्य संरचनामाथि आक्रमण गरेपछि द्वन्द्व चर्किएको हो। आणविक वैज्ञानिकको मृत्यु र प्रमुख सैन्य पूर्वाधार ध्वस्त भएपछि परिस्थिति विश्वव्यापी चिन्ताको विषय बनेको छ।

पहिले नै चलिरहेको रुस–युक्रेन र इजरायल–हमास युद्धको बीचमा इरान र इजरायलबीच प्रत्यक्ष युद्धको सम्भावना बढ्दै जाँदा विश्वव्यापी आर्थिक तथा राजनीतिक संकट थप चुलिन सक्ने चिन्ता गहिरिएको छ।

शुक्रबार बिहान इजरायलले इरानमाथि व्यापक हवाई आक्रमण गरेपछि दुई मुलुकबीचको तनाव चरम अवस्थामा पुगेको छ।

इजरायली हमलामा परी इरानका थुप्रै उच्चपदस्थ अधिकारी र आणविक वैज्ञानिकहरूको ज्यान गएको छ।

रिपोर्टहरूअनुसार इरानी सेनाका प्रमुख मोहम्मद बाघेरी, रिभोलुसनरी गार्डका प्रमुख हुसेइन सलामी, र वरिष्ठ कमाण्डर घोलम अली रसिद आक्रमणमा मारिएको जनाइएको छ।

इरानको नातान्जस्थित आणविक प्रशोधन केन्द्रमाथिको आक्रमणमा परी कम्तिमा ६ जना वरिष्ठ आणविक वैज्ञानिकको पनि मृत्यु भएको छ।

तस्निम समाचार संस्थाका अनुसार मारिने वैज्ञानिकहरूमा अब्दुलहामिद मिनुचेहर, अहमदरेजा जोलफाघारी, सैयद अमिरहुसैन फक्ही, मुतलबिजादेह, मोहम्मद मेहदी तेहरान्ची र फरेदुन अब्बासी रहेका छन्।

इजरायली सेनाको दाबी अनुसार, उक्त आक्रमणमा इरानका मिसाइल प्रक्षेपक, एसएसएम प्रणाली,

र सैन्य भण्डारण स्थलहरू समेत ध्वस्त पारिएको छ। इजरायलले दिनभरि इरानको सतहबाट सतहमा प्रहार गर्ने मिसाइल प्रणालीमाथि लक्षित आक्रमणको एक चक्र पूरा गरेको जनाएको छ।

इरानी पक्षले भने इजरायली आक्रमणमा परी कम्तिमा ७० भन्दा बढी नागरिकको ज्यान गएको बताएको छ।

बदलामा, इरानले करिब एक सय ड्रोन इजरायलतर्फ पठाएको दाबी गरेको छ,

जसलाई इजरायली डिफेन्स फोर्स (IDF) ले सम्पूर्ण रूपमा निस्तेज पारेको दाबी गरेको छ।

यस आक्रमणप्रति कडा प्रतिक्रिया दिँदै इरानका सर्वोच्च नेता आयतोल्ला अली खामेनीले इजरायलले

“गम्भीर अपराध” गरेको आरोप लगाउँदै भनेका छन्,

“जायनिस्ट शासकहरूले आफ्नै विनाशको बीउ रोपेका छन्।”

तेहरान विश्वविद्यालयका सुरक्षा अनुसन्धानकर्ता मोहम्मद इस्लामीका अनुसार,

इरानले इजरायलमाथि तुरुन्तै प्रत्याक्रमण गर्ने तयारी गरिरहेको छ

र लक्ष्यमा सैन्य तथा आणविक पूर्वाधारहरू रहनेछन्। उनले यो द्वन्द्वलाई १९८० को इरान–इराक युद्धसँग तुलना गरेका छन्।

इरान इजरायल युद्ध 2025 को सम्भावित असर

इरान इजरायल युद्ध 2025 ले विश्व राजनीति र सुरक्षा सन्तुलनमा गहिरो असर पार्ने संकेत देखिएको छ।

आणविक वैज्ञानिकको हत्या, सैन्य पूर्वाधार ध्वस्त पारिनु, र दुवै देशका नेताहरूको कडा चेतावनीले यो द्वन्द्व अझ जटिल बन्ने अनुमान गरिएको छ।

यदि तत्काल समाधान नभए, यसले विश्वव्यापी इन्धन संकट, आर्थिक मन्दी र राजनीतिक ध्रुवीकरण निम्त्याउन सक्छ।

इरान इजरायल युद्ध 2025 को अवस्था नियन्त्रित नहुने हो भने,

यो पछिल्लो केही दशकको सबैभन्दा खतरनाक सैन्य संघर्ष बन्न सक्ने विशेषज्ञहरू चेतावनी दिन्छन्।